fac-similé réduire la fenêtre zoomer dans le manuscrit dézoomer dans le manuscrit galerie d'images
fac-similé fac-similé
Du Ryer, 1647

LE CHAPITRE DES SIGNES
cœlestes, contenant vingt versets,
escrit à la Meque.

Plusieurs Docteurs l’intitulent le Chapitre des Chasteaux.

AU nom de Dieu clement & misericordieux. Je jure par le Ciel orné de signes, par le jour du Jugement, par les Anges & par les hommes, que ceux qui ont fait des fossés remplis de feu pour brusler les vray-croyans, seront tesmoins de leurs propre malice, & advouëront que le feu les a bruslé eux-mesmes, pour leur faire cognoistre l’unité de Dieu, & la verité de sa loy ; Dieu est tout-Puissant & tousjours victorieux, il est Roy des Cieux & de la Terre, il void tout ; Ceux qui tourmenteront les vray-croyans & ne se convertiront pas, seront damnez, ils brusleront eternellement dedans le feu d’Enfer, & ceux qui croiront en Dieu & qui feront de bonnes œuvres demeureront dans des jardins delicieux où coulent plusieurs fleuves où ils joüiront à jamais d’une supréme felicité. La colere de Dieu est forte, il fait mourir, & ressusciter [ 628] ses creatures quand bon luy semble, il est misericordieux envers ceux qui se repentent de leurs pechez, & ayme ceux qui le servent. Il a creé son Trosne auquel loüange est eternellement deüe, il esleve qui bon luy semble, & rien ne luy est impossible. As-tu oüi l’histoire des gens de Pharaon & de Temod ? Dieu chastiera de mesme façon ceux qui ne croiront pas en sa loy, il les cognoist tous. Certainement l’Alcoran precieux est escrit dans le livre qui est gardé au Ciel.