fac-similé réduire la fenêtre zoomer dans le manuscrit dézoomer dans le manuscrit galerie d'images
fac-similé fac-similé fac-similé fac-similé
Du Ryer, 1647

LE CHAPITRE DU MISERICORDIEUX, contenant soixante dix-huict versets,
escrit à la Medine.

AU Nom de Dieu clement & misericordieux.

Le misericordieux a enseigné l’Alcoran, il a creé l’homme & luy a donné l’usage de la raison, il a creé le Soleil & la Lune pour compter les saisons ; les estoiles & les arbres l’adorent, il a eslevé les Cieux, il a estably la justice, & a ordonné de peser à bon poids, il a creé la terre pour l’ habitation des hommes, & toute sorte de fruicts, de grains & de feüilles, il a creé les vents & les tourbillons, ô (hommes & Demons) quel Seigneur reniez-vous autre que vostre Seigneur ? Il a crée l’homme de terre comme un pot, & a creé les Demons de la flamme du feu, quel Seigneur reniez-vous autre que vostre Seigneur ? Il est Seigneur des deux Ponans & des deux Levans, quel Seigneur reniez-vous autre que vostre Seigneur ? Il fait mesler l’eau douce avec l’eau salée, & l’une se mesle facilement l’une avec l’autre, quel Seigneur reniez vous autre que vostre Seigneur ? Il fait sortir de la mer les perles & le corail, quel Seigneur reniez vous autre que vostre Seigneur ? il a créez les navires qui coulent sur [ 562] la mer gros comme des montagnes, quel Seigneur reniez vous autre que vostre Seigneur ? Toute chose prendront fin, & la face de ton Seigneur majestueuse & glorieuse sera permanente, quel Seigneur reniez vous autre que vostre Seigneur ? Tout ce qui est au Ciel & en la Terre demande sa grace, il est tousjours luy-mesme, quel Seigneur reniez vous autre que vostre Seigneur ? O hommes & Demons je vous demanderay compte de vos actions, quel Seigneur reniez vous autre que vostre Seigneur ? O hommes & Demons sortez des extremitez du Ciel & de la Terre, outre passez-les si vous pouvez, vous n’en n’avez pas le pouvoir, quel Seigneur reniez vous autre que vostre Seigneur ? S’il envoye contre vous des flammes sans fumée, & de la fumée sans feu, vous ne vous en pourrez pas deffendre, quel Seigneur reniez vous autre que vostre Seigneur ? Lors que le Ciel s’ouvre il semble une rose ou une peau rouge cramoisi, quel Seigneur reniez vous autre que vostre Seigneur ? Le temps viendra qu’on demanderera compte aux hommes & aux Demons de leurs pechez, quel Seigneur reniez vous autre que vostre Seigneur ? Les meschans seront cognus à leur fizionomie, on leur demandera compte de leur promptitude & de leur negligence, quel Seigneur reniez vous autre que vostre Seigneur ? Voila l’Enfer que les meschans n’ont pas voulu croire, ils tourneront à l’entour & à l’entour d’une eauë boüillante de laquelle ils bevront, quel Seigneur reniez vous autre que vostre Seigneur ? [ 563] Ceux qui auront eu la crainte de Dieu devant les yeux entreront dans des jardins où les arbres sont couverts de branches & de feuilles, ornez de ruisseaux & de fontaines avec abondance de toute sorte de fruicts, quel Seigneur reniez vous autre que vostre Seigneur ? Ils seront appuyez sur de beaux lits doublez de rouge cramoisy, quel Seigneur reniez vous autre que vostre Seigneur ? Ils cueilleront des fruicts de ces jardins à leur contentement, quel Seigneur reniez vous autre que vostre Seigneurs ? Il y auront des femmes qui ne jetteront la veuë que sur eux, & que personne ne touchera ny homme ny Ange auparavant eux, quel Seigneur reniez vous autre que vostre Seigneur ? elles sembleront du corail & des rubis, quel Seigneur reniez vous autre que vostre Seigneur ? Les bien-faicts sont recompensez par des bien-faicts, quel Seigneur reniez vous autre que vostre Seigneur ? Il y a encore d’autres jardins où il y a des herbes grandement vertes, des fleuves, des dattes, des grenades & toute sorte de fruicts, quel Seigneur reniez vous autre que vostre Seigneur ? Il y a dans ces jardins des femmes qui ont les yeux tres-noirs & le corps tres-blanc, elles sont couvertes de pavillons, & personne ny hommes ny Anges ne les toucheront auparavant leurs maris, quel Seigneur reniez vous autre que vostre Seigneur ? Elles seront appuyées sur des tapis verds auprés des ruisseaux bordez de fleurs, quel Seigneur reniez vous autre que vostre Seigneur ? [ 564] Loüé soit le nom de Dieu ton Seigneur, honneur & gloire luy sont dües eternellement.