INCIPIT DOCTRINA MACHUMET,
QUAE APUD SARACENOS MAGNAE
Authoritatis est : ab
eodem Hermanno translata, cum esset
peritissimus utriusque linguae, Latinae scilicet atque
Arabicae.
Hic libellus a Machumete scriptus non est, sed
ab alio eiusdem spiritus propheta : qui forma dialogi comprehendere
summatim uoluit praecipua dogmata Machumetis. Estque a sectatoribus
receptus inter authenticos libros. Quem pius lector cognoscet, non
tantum ut Milesias et
Apuleianus
Apuleianas
fabulas : sed etiam ut exemplum doctrinae, in quam iusto
Dei iudicio prolabuntur, qui Christi Seruatoris doctrinam salutiferam
non habent in precio, et libentius attendunt fabulis a ueritate animos
abducentibus.
Erat nuncius Dei, oratio Dei super eum et salus, sedens inter
socios in ciuitate sua Iesrab, et descendit super eum angelus Gabriel
dicens :
salutet
Salutat
te Deus o Machumeth. Respondens ait : Ipse est dominus
salutis. Ab eo namque procedit, et ad eum reuertitur. Et ille :
Veniunt, inquit, ad probandum te quatuor uiri prudentissimi. Ipsi
principes Iudaeorum, et magistri in Israël. Maximus eorum Abdia iben
Salon. Praeterea dictus Abdalla iben seleh. Cui Machumet : Ad salutem
ueniunt amice, an in opprobrium ? Ad salutem, inquit. Tunc nuncius Dei
patruelem suum Haali, filium Abitalib, in occursum eorum egredi iubet,
descriptis ex nomine singulorum personis et habitu. Qui cum
occurreret, salutat dicens : Salue Abdia iben Salon, et caeteri per
ordinem, singulos suis nominibus appellans. Qui admirantes rogant,
quis ei singulos ita discrete indicarit, aut unde praescierit
uenturos. Respondit, se missum a patruele suo Machumet, cum huiusmodi
indiciis. Sequuntur uirum conferentes inter se de iis quae audierant,
non sine admiratione. Cum ergo peruenissent ad prophetam, procedens
Abdia iben Salon, ait : Salus super te Machumet. Et ille : Salus,
inquit, super eum qui salutem sequitur, et potentiam Dei timet. Cui
Abdia : Ego, inquit, Abdia iben Salon, et hi socii mei periti legis
nostrae, uenimus legati a populo Iudaeorum, exquirendi causa a te loca
per legem nostram minus perspicua nobis. Videris enim, prout
audiuimus, qui laborem hunc si placuerit, facile absoluere possis. Et
ille : Ad temptandum, inquit, an ad inquirendum ? Ad inquirendum, ait.
Licet igitur, inquit, quantum libuerit, quaeras. Tunc ille ex centum
quaestionibus principalibus, quas per omnem legem suam exquisite
excerptas, scriptas attulerat, primam proponens ait : Dic ergo, si
placet, in primis o Machumet, propheta es, an nuncius ? Respondit, Et
prophetam et nuncium constituit me Deus. Sic enim ait in Alchoran :
Partem misi super te, partem non misi. Et sermo Dei alter : Nec est
possibile homini colloqui Deo, nisi per internuncium. Ait, Verum
dicis. Dic ergo, legem tuam praedicas, an legem Dei ? Respondit, legem
Dei. Et ille : quid est lex Dei ? Respondit, Fides. Quae fides ? Ait,
Non dii, sed Deus ipse unus, sine participe. Ego Machumet seruus et
nuncius eius, praedicans finem, quo sine dubio mortui resurgent. Ait,
Verum est quod dicis. Dic itaque si
[190]
placet,
quot sunt leges Dei ? Respondit, una. Quid ergo dices de prophetis,
qui te praecesserunt ? Respondit : Lex quidem, siue fides, omnium una,
sed ritus diuersorum nimirum diuersi. Ait : Ita est, ut dicis. Sed dic
deinde, Intrabimus paradisum pro fide, aut credulitate, aut pro
opere ? Respondit, Et tria haec necessaria. Et contingit tamen, ut si
quis ex Iudaeis aut Christianis siue gentilibus ad fidem Saracenorum
conuersus ante opus morte occupetur, sola fides sufficiat. Sicque siue
Iudaeus, siue Christianus, siue etiam gentilis, omni pietatis operi
satisfaciens, nec id amore Dei, et ipsum et opus eius ignis assumet.
Ait, uerum est. Sed dic, si placet, misit Deus tibi scriptum ?
Respondit, sic. Quod ? Dicit, alfurcan. Cur dictum alfurcan ? Dixit,
quia discretae sunt sententiae et figurae eius : Nec enim simul
descendit super me uerbum Dei, quemadmodum simul data est lex Moysi,
psalmi Dauid, et euangelium Christo. Ait, uerum dicis. Dic ergo
consequenter, quod habet principium alfurkan ? Respondit : initium
libri, In nomine Dei misericordis et miseratoris. Quid post ? Ait,
abuget, et caetera. Quid est abuget ? Respondit : a, deus. b, potentia
dei.
g
c
, pulchritudo dei. d, lex dei. Praeuenit enim Dei pietas
iram. Ait ille : id quomodo ? Respondit : cum enim prae caeteris
creatus Adam, primum consurgeret, stertuitauit. dixit, Deo gratias.
Quod audientes angeli dicunt, Pietas Dei super te Adam. Et ille, amen.
Quibus dominus, Praecepi orationem uestram. Ait, ita quidem est, ut
dicis. Procede ergo, et enumera si placet, quae sunt illa quatuor
genera, quae Deus propriis manibus operatus est ? Respondit : Manibus
quidem propriis aedificauit paradisum altiorem, plantauit arborem
tubae, plasmauit Adam, scripsit tabulas Moysi. Ait : Et haec quidem
ita, ut dicit : solum ut adiungas, quis tibi indicauerit. Respondit :
Gabriel, ex domino uniuersitatis. Ait, Ita certe uerum est, tantummodo
subiungas, in qua forma, uiri an foeminae ? Respondit, uiri sane :
erectus, nunquam dormiens, neque comedens, neque bibens, nisi laudem
et gloriam Dei. Ait, et hoc quoque uerum. Nunc itaque si placet, per
ordinem exponas, quid est unum, deinde quae duo, quae tria, quae
quatuor, V. VI. VII. VIII. IX. X. et ita per ordinem, usque ad centum.
Respondens ait : Unum quidem Deus, cui nec particeps, nec socius, nec
filius, in eius manu uita et mors, ipse super omnia potens. Duo uero,
Adam et Eua. unde par in paradiso, antequam eiicerentur. Tria uero,
Michael, Gabriel, Saraphiel, archangeli secretarii deitatis. Quatuor,
lex Moysi, psalmi Dauid, euangelium, et alsurkan. Quinque sunt
orationes Dei, quas mihi Deus et populo meo nulli prae caeteris
saeculi prophetarum datas, neque futuri cuiquam. Sex, dies illi quibus
creaturam suam Deus consumauit. Septem, sunt coeli. Sic enim ait in
Alchoran : Ordinauit septem coelos. Octo sunt angeli, qui in die
iudicii portabunt thronum Dei. Nouem miracula, miracula Moysi. Decem
uero, dies ieiunii : quorum tres in itinere peregrinationis, septem in
reditu. Undecim stellae, quas Ioseph in somnio se adorare uidit.
Duodecim, menses anni. Tredecim uero, undecim uidelicet stellae, cum
sole et luna. Quatuordecim, candelae pendentes circa thronum Dei,
longitudine quingentorum annorum. Quindecim, quoniam Alchoran continuo
quidem descendit a summo coelo usque ad infimum : inde paulatim lapsus
est usque ad quintum decimum diem ramadam. sic enim ait Alchoran :
Mensis ramadam, in quo descendit Alchoran. Sedecim, sunt legiones
angelorum Cherubin circa thronum Dei, laudantes nomen domini sui.
Decem et septem, nomina Dei inter
[191]
imum
terrae et infernum : quae si interposita non essent, erumpens aestus
inferni totum mundum consumeret. Decem et octo, interstitia inter
thronum Dei et aërem : quae si interposita non essent, claritas Dei
totum mundum excaecaret. Decem et nouem, sunt brachia zachae
infernalis fluuii, qui in die iudicii ualido sonitu clamabit, et
respondebunt omnes damnati. Viginti, quia uicesimo die ramadam
descenderunt psalmi super Dauid. XXI. Nam uicesimo primo die ramadam
natus est Salomon, et montes laudauerunt Deum. Viginti duo, Nam
uicesimo secundo die ramadam, ignouit Deus Dauid peccatum Uriae.
XXIII. nam uicesimo tertio die ramadam natus est Christus, filius
Mariae, orationes Dei super eum. Vicesimo quarto, locutus est dominus
Moysi. Vicesimo quinto, diuisum est mare Moysi, et populo Israël.
Vicesimo sexto, dedit Deus tabulas Moysi. Vicesimo septimo, deglutiuit
cetus Ionam eiectum naui. Vicesimo octauo, reddidit Deus uisum Iacob,
cum afferret Iudas camisiam Ioseph. Vicesimo nono, assumpsit Deus
Enoch. Tricesimo, abiit Moyses in montem Sinai. Hic interrumpit
Iudaeus, dicens : Fac breue, optime Machumeth, et expedite. Siquidem
mirum in modum cuncta exequeris. Faciam, inquit, quod postulas. Sed ne
ante finem quaesiti desistam : Quadraginta sunt dies, quos ieiunauit
Moyses. Quinquaginta uero, quia diem iudicii continuabit spacium
quinquaginta milium annorum. Sexaginta sunt uenae terrae singulorum
colorum : quae uarietas si non esset, nulla inter homines foret
noticiae discretio. Septuaginta uiros assumpsit sibi Moyses.
Octuaginta ictus debentur inebriato. Nonaginta, quia † angelus missus
ad Dauid, ait : Nonaginta oues habebat hic socius meus, et ego unam,
quam abstulit mihi. Centum uero sunt ictus, quibus in adulterio
depraehensi flagellantur. Ait, Et habet quidem omnia ita recte, ut
sunt, integre executus es. Procede ergo si placet, et expone, quomodo
facta est terra, et montes, et quae eis nomina, et quando fuerunt ?
Respondit, Deus Adam de limo, Limus autem erat de spuma, Spuma autem
de procellis, Procellae uero de mari, Mare autem de tenebris. Tenebrae
uero de luce, Lux de uerbo, Verbum de cogitatione, Cogitatio uero de
iacinto, Iacintus autem ex praecepto Esto et fuit. Ait, Verum est
quicquid dicis. Dic ergo, quot angeli praesunt hominibus ? Respondit :
Singulos homines bini circumstant angeli, alter a dextris, alter a
sinistris. Dexter uero benefacta hominis scribit, Sinister malefacta.
Ait, Ubi assident homini, aut qualiter ? in quo scribunt ? Respondit :
Super humeros homines sedent. Calamus, lingua eorum : incaustum,
saliua linguae : Tabula notoria, cor eorum. Ait, Et hoc quoque uerum
est. Sed prosequere, si placet : Quid post hoc operatus est Deus ?
Respondit, Tabulam et calamum, Dic, quam tabulam, et quem calamum ?
Respondit : Tabulam quidem, in qua scriptum est quicquid fuit, est et
erit, in coelo et in terra : Calamum uero, de luce clarissima. Ait,
Quem longitudo calami ? Respondit : Longitudo quidem itineris
quingentorum annorum, latitudo uero octuaginta itineris annorum.
Octuaginta dentes habet, qui non cessabunt scribere, quicquid fit in
mundo, usque ad diem iudicii. Sic enim ait in Alchoran : Nun uuacalam
uua me asturum. Ait, Et tabula unde ?
resondit
Respondit
, De smaragdo uiridissimo, uerba eius de margaritis,
dorsum eius de pietate. Ait, Quotiens ergo respicit Deus illam tabulam
per diem et noctem, Respondit, Centum sexaginta, singulisque
respectibus erigit quem uult, et deponit quem uult. Sic enim ait in
Alchoran : Quotidie Deus in uoluntate sua. Ait, Nec de his
[192]
quicquam, nisi uerum. Procede ergo, et expone,
cur coelum dictum est coelum ? Respondit : Ideo quidem, quia de fumo
creatum : fumus uero, uapor maris. Sic enim ait in Alchoran : Vualme
am uuaegehu. Ait : Quid ergo habet, quod uiride est ? Respondit, ex
monte kaf. Mons enim kaf ex smaragdis paradisi. Qui mons orbem terrae
cingens, coelum sustinet : sic enim ait in Alchoran : kaf uualcoram
elmegid. Ait, Habet itaque coelum portas ? Respondit : Habet, itaque
portas pendentes. Ait, Et portae claues ? Respondit : Et portae claues
in thesauro Dei. Ait, Et portae unde ? Respondit : Portae aureae,
portarum serae de luce, claues de pietate. Ait, Vera refers. Sed
coelum istud nostrum, dic unde creatum est ? Respondit, Primum de aqua
uiridi, secundum de aqua clara, tertium de smaragdo, quartum de auro
purissimo, quintum de hiacinto uiridi, sextum de nebula lucida,
septimum de splendore ignis. Ait, Neque hoc quicquam nisi uerum. Quid
ergo super coelos septem ? Respondit, Mare uiuificum. Ait, Quid
deinceps ? Respondit, Mare nebulosum. Ait, Prosequere per ordinem
usque ad summum. Procedit desuper mare aëreum. desuper mare lapideum,
desuper mare tenebrosum, desuper mare solatii, desuper luna, desuper
sol, desuper nomen Dei, desuper supplicatio, desuper Gabriel, desuper
pergamenum rasum, desuper plenum, desuper septuaginta interualla
lucis, desuper LXX. millia interuallorum uirtutes, desuper LXX. millia
montium, desuper mille spacia, in unoquoque LXX. milia turbae, in
unaquaque turba quinque milia angelorum, nunquam cessantium laudare
dominum uniuersitatis. desuper addet almuncihe, id est terminus
angelicae dignitatis : desuper uexillum gloriae, desuper interualla de
margaritis, desuper interualla gratiae, desuper interualla potentiae,
desuper
interualle
interualla
diuinitatis, desuper interualla dispensationis, desuper
scabellum, desuper solium, desuper domus uniuersitatis. Ait, Mirum in
modum cuncta, pro
ut sunt executus
[1]
es. Sequitur itaque, ut decernas, si placet, utrumne
fideles sint sol et luna, an infideles ? Respondit : Fideles quidem,
et obedientes omni mandato Dei. Quid ergo habent, quod non aequaliter
lucent ? Respondit : Aequali quidem uirtute et splendore creauit eos
Deus. Euenit ergo, ut incerta esset diei et noctis uicissitudo,
quousque Gabriel praeteruolans motu uolitandi, forte ut sic ala sua
lunam tetigit, et ex inde luna obscurata est. Sic enim ait in
Alchoran : Praeposui diei et nocti luminaria, et extinxi nocturnum, et
illuminaui diurnum. Ait : Cur ergo nox dicta nox ? Respondit, Quia nox
uelamen maris et foeminae. sic enim ait in Alchoran : Posui noctem
uestimentum, et diem uictum. Ait, Et hoc quoque prout ueritas habet.
Consequenter itaque, si placet, edissere, quot sunt ordines
stellarum ? Respondit, Tres. primus, dependentium per cathenas a solio
Dei lucentium usque in septimum thronum : secundus, stellarum quae et
coelum ornant, et quando diaboli ad insidiandum coelestibus consiliis
subintrare parant, occurrentes fugant. Sic enim ait in Alchoran : Et
coelum cum eis ornauimus, et diabolis eas obiecimus. Tertius est
inspectu angelorum. Ait, Neque haec uspiam a ueritate recedunt. Dic
ergo, quot intersunt inter nos et coelum maria ? Respondit, septem.
Ait, quot uero uenti inter nos et coelum. Respondit, tres. Primus
uentus sterilis, quem emisit Deus ingentem abat. Secundus niger,
eleuans mare : et hic exasperabit ignem in die iudicii. Tertius est,
qui terris marisque ministrat. Ait, Neque hic quicque nisi uerum. Quot
sunt interualla inter nos et coelum ? Unum plane : quod nisi
interpositum esset, omnia terrena coelestis consumeret ardor. Ait, Et
hoc certe uerum. Si solum subiungas, ubi sol :
[193]
Respondit, In fonte calido, fons uero in colubro, coluber in
interuallo, interuallum in monte kaf, kaf autem in manu angeli
tenentis mundum usque in diem iudicii. Ait, Verum est quod dicis. Dic
deinde, Quis modus deferentium sedem Dei ? Respondit : Capita eorum
sub sede Dei, pedes sub thronis VII. tanta quidem ceruicis
amplitudine, ut si continue uolaret auis, uix mille annis ab una aure
perueniret ad alteram. Cornua super capita eorum implicata, uictus et
potus eorum laus et gloria Dei. Quorum prima acies, cuius dimidium
nix, dimidium ignis. nec tamen uel ignis niuem consumit, uel nix ignem
extinguit. Secunda acies, cuius dimidium tonitruus, dimidium fulgur
impermixta. Tertia, cuius dimidium gleba, dimidium unda : nec tamen
unda glebam diluit, uel undam ebibit gleba. Quarta, cuius dimidium
uentus, dimidium aqua, incommota ab inuicem. Quinta, cuius dimidium
ferrum, dimidium ignis, inconfusa ab inuicem. Sexta, cuius dimidium
aurum, dimidium argentum. Septima, cuius dimidium laus, dimidium
gloria. Octaua, de fulgidissimo splendore. Ait, Nec hoc quoque uspiam
aliter quam ueritas habet. Nunc itaque fiducialiter oro, ne pigeat,
exequaris spacium a nobis usque ad coelum. Respondit : A nobis quidem
usque ad infimum coelum, iter quingentorum annorum : tantumque per
ordinem ab unoquoque ad proximum, et amplitudo uniuscuiusque itinerum
quingentorum annorum : Tot unoquoque angeli, quod nemo numerare
potest, nisi solus Deus. Ait, Et hoc quoque uerum. Dic itaque
consequenter, quae aues sunt inter nos et coelum ? Respondit : Aues
quaedam, quae nec coelum neque terram unquam attingunt. Ipsae colubri
albi iubas habentes equinas, comas ut coma mulieris, alas ut aues. Oua
pariunt super caudas suas, ibidemque filios producunt, illinc usque in
diem iudicii. Ait, Ita quidem uerum est. Dic ergo, mundus iste cur
dictus mundus ? Respondit : quia mundus iste factus fuit praeter aliud
saeculum. Si enim cum illo factus esset, perpetuus foret, ut illud.
Ait : uerum est, Dic deinde, finis cur dictus finis ? Respondit, quia
eo resurget omnis creatura. Ait, Ita est. Subiunge ergo, saeculum
aliud, cur dictum aliud ? Respondit, quia postremum, post mundum istum
superstes futurum, cuius nulla similitudo exprimi potest. Nec enim
coloni eius mortales, neque dies eius sub numero. Ait, Similiter et
hoc uerum. Sed quid ? Aliquid nempe hodie proponam, ubi incidas. Dic
ergo si placet, Quis filius patre fortior ? Respondit, ferrum. Quid
ferro ? ignis. Quid igne ? aqua. Quid aqua ? uentus. Ait, et haec
omnia uera. Nec cesses, sed dic consequenter : Adam cur dictus Adam ?
Respondit, quia creatus de limo terrarum omnium, non unius. Si enim de
uno creatus esset, nulla esset inter homines noticiae discretio. Ait :
Ita est : dum subiungas, Cum factus fuit Adam, qua intrauit spiritus
in eo ? Respondit, per os intrauit inuitus, et per os exiuit. Ait,
Quid ergo dixit, ei Deus ? Respondit, Habita tu et coniunx tua
paradisum : Comedite et bibite, tantum ne huic arbori appropinquetis.
Ait, Quaenam fuit arbor illa ? Respondit, arbor tritici. Ait, Quae
forma arboris ? Respondit, septem spicas habebat. unam rapuit Adam, in
qua erant grana quinque, de quibus duo comedit Adam, duo dedit Euae,
quintum detulit secum. Ait, Quantum fuit granum ? aut quid inde
fecit ? Respondit, Magis fuit ouo, quod ubi in sexcentas particulas
comminuisset, produxit ex eo cuncta seminum genera. Ait, Qua receptus
est paradiso expulsus ? Respondit : Adam in India, Eua in Nubia. Ait,
Quid induebant ? Respondit, Adam
[194]
tria folia
de paradiso, Euam coma cooperiebat. Qua ergo conuenerunt ? Respondit :
In Arafe, Ait, Uter de altero factus ? Respondit, Eua ex Adam. Unde
est quod mulier operitur ? Ex costa eius sinistra. nam si a dextra,
aeque fortis esset. Ait, Quis habitauit terram ante Adam ? Respondit,
Primum diaboli, deinde angeli, post angelos Adam. Inter diabolos et
angelos septem millia annorum, inter angelos et Adam M. anni. Ait, Rem
omnem ut gesta est narras. Sed de his satis est. Transeamus ad alia :
et dic si placet, Quis incoepit peregrinationem ? Respondit, Adam.
Ait, Quis rasit caput ei ? Respondit, Gabriel. Ait, Quis circumcidit
Adam ? Respondit, ipsemet. Ait, post Adam quis circuncisus est ?
Respondit, Abraham, Ait, Et haec quidem manifesta sunt. Habemus alia.
Dic si placet, Quaenam est terra, quam semel uidit sol, nunquam deinde
uisurus usque ad finem saeculorum ? Respondit : Quando mare diuisit
Moyses, denudatus est fundus pelagi, quem tunc uidit sol, post reditum
undarum amplius non uisurus. Quid ergo uidetur Abdia, ne reperis haec
in lege tua ? Et ille, Nec haec quidem, nec multa alia, quae pectus
mihi ministrat. Age, Dic deinde, quaenam est domus habens duodecim
portas, per quas duodecim portiones exeunt, duodecim cum
generationibus ? Respondit, Rupis illa, quam percussit Moyses, aperuit
duodecim portas, et emisit duodecim fontes, per duodecim tribus
Israël. Ait, Verum dicis. Sed dic, cui terrae locutus est Deus ?
Respondit, Monti Synai praecepit, ut eleuaret Moysen usque ad coelum.
Ait, Bene dicis. Dic deinde, qui uiuit, nec habens spiritum ?
Respondit, Nox. nec enim spiritus uenit usque ad mane. Ait, Hoc quoque
uerum. Age ergo. quid in primis lignum, postea cum spiritu ?
Respondit, Virga Moysi nunc lignum, nunc serpens. Ait, ita est. Nunc
itaque refer, si placet, Quae foemina ex masculo tantum, et quis
masculus de foemina tantum ? Respondit, Eua ex Adam solo, Christus ex
Maria uirgine ? Ait, ita quidem refers, ut uerum est, dum subiungas,
Quae sunt terra illa, quae sine uiri commixtione edita fuerunt ?
Respondit, Adam, aries Abrahae, et Iesus Christus. Ait, uerum est. Dic
deinde, quod sepulchrum motum est cum sepulto ? Respondit, Cetus cum
Iona. Ait, uerum est. Dic ergo consequenter, qui sunt soli illi duo,
quorum sepulcra ignorantur ? Respondit, Abitabil, et Moyses. Ait, Id
quomodo ? ut breuiter de utroque exponas. Respondit : Ibetabil quidem
cum mortem praesentiret, iniunxit, ut post obitum camelus superposito
f unere suo impelleretur ad eundum, quocunque sors
duceret, euntemque sequerentur, quousque sponte procumberet. Sic
facto, ubi funus ab Ibetabil deferens camelus procubuit, fodiendo
repertum est monumentum, quod Noë praeparauit Abitabil. Sepulto itaque
amissus est locus, nec unquam postea repertus. Moyses uero cum solus
per desertum uagaret, forte sepulcrum uacuum et apertum inuenit, recte
ad quantitatem suam effossum. Quod admirans, incoepit ad propriam
staturam metiri. Interea angelus mortis aduenit ad interficiendum
Moysen. Quem cum cognouisset Moyses, quaesiuit dicens : Ad quid
uenisti ? Respondens, missus sum pro anima tua. Cui Moyses. Qua ergo
putas eam eripere ? per os enim non poteris, quo locutus sum Domino :
neque per aures, quibus audiui uocem Domini : neque per oculos, quibus
faciem domini uidi : neque per manus, quibus donum Dei recepi : neque
per pedes, quibus montem Synai conscendi. His auditis, abiit angelus.
formaque mutata, attulit pomum de paradiso. quod cum olfaciendum
[195]
porrigeret, recepit Moyses. Cumque naribus
apponeret, arripuit eum angelus per nares, per quas tanquam emungens
animam eius extorsit. Quo facto, remansit corpus eius in sepulchro,
nemini unquam reperto. Ait, ita quidem factum est, ut dicis. Sed dic
quis ignis comedit et bibit, et ex quo extinguitur, non accenditur
usque in diem iudicii ? Respondit, Ignis in corpore humano, uictu
sustentatur, et anima abeunte extinguitur. Nec antequam illa redeat,
accendetur. Ait, Et ita uerum est. Dic deinde, quid paruum semper,
quid magnum semper ? Respondit, Lapilli, et montes. Ait, bene est, Sed
dic, ubi est medium terrae ? Respondit, In Hierusalem. Inde namque
dispersae sunt gentes, et illic congregabuntur. Ibi erit pons et
statera super infernum, quod apportabunt illuc septuaginta millia
angelorum per totidem tenaces. Ait, Et ita est. Sed quare Hierusalem
dicta domus benedicta ? Respondit, quia in directo coelestis
Hierusalem, quodque locutus est ibi Deus et angeli cum patriarchis et
prophetis : deditque ibi Deus Moysi praecepta tria millia quingenta
quindecim. Ait, Et ita constans est. Dic deinde, quis humor fit neque
de coelo, neque de terra ? Respondit, sudor animalium laborantium.
Ait, bene dicis. Sed memora. si placet : quomodo facta est nauis ?
Respondit,
Nauuem
Nauem
incoepit primus Noë : claues dedit Gabriel : intrauitque
Noë cum filiis, et procedens ex Arabia super Meccam, circuiuit
septies. Inde nauigans super Hierusalem, et eam septies circuiuit,
peruenit in montem Iudaeae, ibique decrescentibus undis, haerens
resedit. Ait, quidem ita est. Dic ergo, ubi fuit interim Mecca ?
Respondit, Assumpsit eam Deus in coelum, Hierusalem uero commisit
monti Abikobez, et seruauit eam in uentre suo. Ait, Omnia quidem ut
gesta sunt, exponis. Dic ergo, Quae ratio, quod qui nascitur similis
est patri, aut matri, eorumue parentibus ? Respondit, Quum superat
uoluptas uiri uoluptatem mulieris, trahit conceptus similitudinem
patris, eiusque parentum : Sic in parte altera, superante mulieris
libidine. Ait, Et hoc uerum. Expone consequenter, punit Deus quenquam
sine ratione ? Respondit, non. Ait, Et filiis infidelium quid faciet ?
Respondit, Venient in die iudicii filii infidelium ante faciem Dei, et
dicet eis : Quis est dominus uester ? Dicent, Tu domine, qui creasti
nos. Cui ergo seruisti ? Quem adorasti ? Domine noster, neque aurium,
neque linguae officio uti, neque nuncium tuum sequi potuimus. Dicet
eis, Faceretis ergo aliquid si praeciperetur uobis ? Dicent, Digne
domine noster et iuste, quicquid praecipere placet. Tunc effluere
praecipiet unum de fluuiis inferni, et dicet eis : Insilite in
gurgitem istum. Hinc ergo qui obedierint, illaesi exibunt, et in
paradisum transibunt : qui uero renuerint, ibunt cum patribus suis in
infernum. Sic enim ait in Alchoran : Qui obedierint, erunt in
paradiso, qui renuerint, in inferno. Ait, Vere ita est. Sed uellem, si
est aliqua horum similitudo, eam mihi exprimeres. Respondit, Ita. Nam
et fidelium filiis, si qui nascuntur caeci, surdi, muti, eadem fit
quaestio. Ait, ita quidem uidetur, dum consequenter exponas, Quomodo
soluetur terra ? Ignis terram diriget in cinerem. Cinerem aqua diluet.
Ait, Ita est. Sed montes unde exierunt ? Respondit, de monte Kaf,
fixitque eos Deus palos in terra. Sic enim ait in Alchoran : Posui
terram planam, et montes palos terrae. Ait, Verum dicit. Dic
consequenter, quidnam restat sub his septem terris ? Respondit, Bos.
Ait, et pedes bouis super quid ? Respondit, super lapidem album. Ait,
quae forma bouis ? Respondit, caput
[196]
eius in
oriente, cauda in occidente. Ei quadraginta cornua, et totidem dentes,
a cornu ad cornu iter mille annorum. Ait, Et sub lapide, super quem
stat. quid ? Respondit, Mons cui nomen Zohot. Ait, Cuius hic mons ?
Respondit, inferni. Ait, Quae ei amplitudo ? Respondit, Itineris mille
annorum. Hunc ascendet omnis turba infidelium. Cumque uerticem
consederint, omnis intremiscet mons, omnemque turbam deiiciet in
profundum inferni. Sic enim ait in Alchoran, Sourhicubu azohot : quod
est, destruet eos zohot. Ait, uerum est, quod dicis. Sed quid sub
monte ? Respondit, Terra. Quod est ei nomen ? Respondit, Vuerelea.
Quid sub ea terra ? Respondit, mare. Quod est ei nomen ? Alkasem. Et
quid infra ? ut omnia per ordinem edisseras. Respondit, terra Aliolen,
infra mare Zere, infra terra Neama, infra mare Zegir, infra terra
therib, infra alia terra Agiba, alba ut lac, redolens ut muscus,
mollis ut crocus, lucida ut luna. Super hanc congregabit Deus omnes
iustos. Sic enim ait in Alchoran : In die illo mutabit terram pro alia
terra. Infra hanc mare Alknitar : Infra piscis nomine albehbut, cuius
caput in oriente, cauda in occidente. Super cuius dorsum terrae et
maria, tenebrae, aër, et montes usque in finem saeculorum. Infra
piscem, uentus piscem substinens, infra mons, infra tonitruus, infra
fulgur. Sub his mare sanguineum, infra infernus conclusus, infra mare
igneum, infra mare opacum, infra mare po*, infra mare nebulosum, infra
laudes, infra glorificatio, infra solium, infra tabula, infra calamus,
infra maius nomen Dei. Et quid infra ? Respondit, Infinita quaerendo
prosequeris Abdia. Quis ultra potest ? Praeter quod aequalis est
undique uersum omnipotentia Dei. Ait, Res mira. Nihil quidem aliter
quam est uel opinari uideris. Sed prosequere deinceps si placet, et
dic. Quae sunt tria quae de paradiso in hunc mundum uenerunt ?
Respondit, Mecha, et Iesrab, et Hierusalem. Ait, Verum dicis. Dum
subiungas, quae quatuor in hoc mundo ex inferno ? Respondit,
Vastat
Vasta
ciuitas aegypti, secunda Antiochia Syriae, tertia Ehberam
Armeniae, quarta Elmeden Chaldaeae. Ait, Et hoc quoque uerum.
Consequenter ergo metire mihi orbem. Respondit, Orbis quantitas iter
unius diei. Ait, Quomodo ? Respondit : Totum enim sol ab ortu suo
usque ad occasum permeat. Ait, Argute quidem hoc animaduertisti.
Nunc itaque si placet, quoniam summa et infima uides, paradisum
oro, et quae incolis eius uita, plane mihi describas. Respondit, Quia
conuenienter et ex ordine quaeris, placet, dum attentus assis.
Paradisi namque solum aureum, smaragdis et hyacinthis crebro
interpositis distinctum, omni fructifera consitum arbore,
decurrentibus per amoena fluentis. Quorum alia quidem lac, alia mel
album, alia uinum purissimum fundunt. Dies enim mille annorum, annus
quadraginta millium annorum. Quid ergo ? Nunquid non ita beatitudini
sufficere uidetur ? Ait, Quinimo, et uere uideri poterit, dum
incolarum eius habitum et usum exequaris. Respondit, Incolis quidem
eius, quicquid desiderari potest, statim aderit. Omni siquidem colore
uestientur, praeter nigrum : Qui color neminem illic attinget, excepto
† praecone modo, qui ob insigne huius uitae meritum proprium colorem
singulari priuilegio retinebit. Perfecti omnes in statura quidem Adae,
in forma uero Iesu Christi, nunquam incrementum aut detrimentum
aliquod patientes. Ait, Haec quidem ita uere sunt. Assume iam de uictu
et uoluptate eorum, a primo introitu incipiens. Respondit, Primum
quidem
[197]
ingressis uescendum proponitur iecur
piscis albehbut, cibus quam ultra mirari possis delectabilis.
Succedunt fructus arborum, potusque defluentis paradisi, deinde
quicquid affectarint, praesto erit. Ait, Dic ergo, cum quicquid
influit, et effluere necesse habet, nonne ut comedent, sic et iam
egerere oportebit ? Respondit, Non sequitur. Nam et infans in utero
dum uiuit, uescitur, nec tamen egerit. Et quam cito egerere incipit,
mortalitatis legem subit. Quae et illos, si egererent, necessitas
consequeretur. Si quid tamen superfluit, id per sudorem exit, odorem
musti fragrantem. Ait, Bene quidem, et discrete huic obiectioni
respondisti, dum subiungas, etiamne panem et carnes comedent, ut
fructus et caetera ? Respondit, Plane quidem quicquid gestierint,
oblectamenta tantum, non fame praeter illicita : quae nec ipsis
placebunt. Ait, Quaenam ? Respondit, uerbi gratia, caro suilla. Ait,
Beasti me, optime Machumet. Eam siquidem et nobis Iudaeis, et scio non
sine causa, prohibuit Deus : quam uelim, ni pigeat, per Deum obsecro
inter caetera, dum locus est, edisseras. Respondit, Placet, dum
studiosus ades. Nam Iesus Christus, dum rogaretur a discipulis, ut
modum arcae Noë, habitumque superstitis in ea generis humani
exponeret, tacitus rogantes audiens, formulam ex luto inter manus suas
confectam iecit humi. Et ait, surge in nomine patris mei. Et surrexit
homo canus. Cui Christus, Tu quis es ? Respondit, Ego Iafeth filius
Noë. Cui Iesus, Itane canus mortuus es ? Respondit, Nequaquam. Sed in
hac ipsa hora, putans me ad diem iudicii surgere, metu canus effectus
sum. Praecepit ergo Iesus, ut omnem historiam arcae discipulis
rogantibus exponeret. Tunc ille rem omnem a primordio narrans, ordine
peruenit ad locum, ubi cum secessus inquit pondere egestionis arcam
inclinaret, timuimus ualde. Consuluit itaque pater Deum. Cui Deus :
Adduc, inquit, elephantem, et uerte posteriora eius super locum. Et
fecit. Ubi ergo elephas fimum suum hominum egestioni iniecit, surrexit
sus grandis. Satisne uidetur ergo causae Abdia, uitandi animal
immundum ? Ait, Certe satis : Dum prosequaris, quid profecerit hac
necessitate editus. Respondit, Quae cum omnem (inquit) massam illam
rostro fossorio dispergeret, conceptum insuetis naribus foetorem
efflans, murem edidit. Qui deinde tum tabulas indesinenter roderet,
consulto pater Domino, leonem in fronte percutit. Leo concitus, flatu
anhelo cattum naribus eiecit. Hic Iudaeus : Bene, inquit, omnia. Sed
hoc satis, ne a proposito longius digrediamur. Et quoniam de uictu
incolarum paradisi plene exposuisti, restat, ut de uoluptate eorum
prosequaris. Et illud primum, quoniam comedent et bibent, si etiam
misceantur illic mulieribus, idque qualiter, et qua lege. Respondit,
Si ullum oblectamenti genus deesset, beatitudo minime plena esset.
Frustra ergo deliciae adessent, si uoluptas deesset. Quinimo si
quicquid uolunt, praesto est, et quascunque, et quomodocunque uolunt
habent, et qualiter, et ubi, et quando, et quantum, et quotiens
uolunt, sine mora et difficultate, ita quidem, quod quas hic uxores
habuerunt fideles, habebunt et illic. caeterae, concubinae erunt.
Ancillarum uero non erit numerus. Ait, Optime quidem et ad unguem
omnia. Sed illuc recolens, quod dicis, praeter illicita : cum illic
uini fluenta describas, quaero quid nam operis illic habeant, si uinum
illicitum est ? aut si licitum est, quid tibi causae assumis in hoc
saeculo uini prohibendi ? Respondit, Adeo quidem argute quaeris, ut
necessario una quaestione geminam responsionem extorqueas. Utrumque
ergo exponam, et illic esse licitum, et hic illicitum. Erant enim
angeli duo Arot et Marot, missi olim a Deo de coelis in
[198]
terram, gubernando et instruendo generi humano,
tribus his interdictis, ne occiderent, nec iniuste iudicarent, nec
uinum biberent. Multo itaque tempore sic habito nocti iudices essent
per uniuersum orbem, uenit eis die quodam mulier prae cunctis foeminis
omnino pulcherrima, causam habens aduersus maritum. Quae ut parti suae
accommodaret iudices, inuitauit ad prandium. Sequuntur. Illa satagens,
conuiuantibus inter epulas et pocula uini apponit. Adstat ministrans,
offert crebro, instat ut sumant. Quid plura ? Vicerunt blandiciae
mulieris. Inebriati poculis, in hospitam formosam incaluerunt. uicti,
accubitum postulant. Spondet ea conditione, dum alter uerbum doceat,
per quod ascendebant coelos : alter, per quod descendebant. Placet
condictio
condicio
. Cum ergo didicisset, eleuata est subito, et ascendit
coelos. Quod cum uideret Deus, explorata causa, posuit eam luciferum,
pulcherrimam inter stellas, ut fuerat inter foeminas. Illis autem in
iudicium uocatis, proposuit eis Deus, ut eligerent inter poenam huius
saeculi et poenam alterius. Elegerunt hanc. Depensi sunt ergo per
cathenas ferreas, demissis capitibus in puteo bebil, usque in diem
iudicii. Quid ergo Abdia ? Nonne sufficiens uidetur causa cur et illic
licitum sit uinum, et hic illicitum ? Ait, certe satis, et merito. Sed
quoniam haec ad plenum exposita sunt, uellem si placet, ut etiam de
inferno breuiter percurras. Recte postulas, et ita faciam. Inferni
siquidem solum sulfureum, fumosum, crebra pice intersertum. Ipse totus
flammis teterrimis aestuans. Sunt in eo lacus et putei profundissimi,
pleni pice feruente, suppositis flammis sulfureis, quibus quotidie
immerguntur damnati. Sunt illic et arbores, quarum fructibus
uescentur : quo cibo nihil grauius in toto mundo excogitari potest.
Ait, Bene omnia exponis, si interseras, ubi est ille, quem Deus
euocabit post diem iudicii ? Respondit, in medio uallis inferni, in
ualle gurges, in gurgite puteus, in puteo arca, in arca uictus
cathenis, astrictus compede, spe constans, per mille annos incessanter
misericordiam appellabit. Ait, Quid ergo faciet ei Deus ? Respondit,
Post mille annos adduci faciet eum, et dicit ei : Quid tibi uis miser,
qui aures meas inquietare non desinis ? Quae te fiducia ducit ? Quo
merito speras ? Respondet gemens, Domine Deus meus, ego non habeo Deum
nisi te, qui misereatur mei. Tu satis habes praeter me, ubi iram tuam
uindices. Miserere mei Domine, miserere mei. Ait, Quid tunc ?
Respondit, eum reddi inferno. Adducetur, nec adhuc inuocare
misericordiam Dei cessabit. Misertus tandem misericors miserator,
eripi praecipiet eum. Cumque pice nigrior eum infernalis calor tangat.
Interrogabunt angeli, qualiter paradisi incolis misceri possit ? Tunc
lauari praecipiet eum Deus in fonte aërio, et fiet albus totus,
praeter maculam in fronte. Mundatus ergo incedet per paradisum, in
publico conspectu omnibus uocabulis. Hic ergo assignabunt eum in
inuicem omnes uidentes, ereptumque inferno, quasi improperando hinc
inde murmurabunt. Ille uerecundus usque adeo pudore superabitur,
quousque dicat, mallem inferno reddi, quam huiusmodi probra longius
ferre. Dicet itaque misericors miserator angelis suis, ut iterum eum
in eodem fonte quinquies lauent. Quod ubifecerint, auferetur nota de
fronte eius, fietque similis paradisi incolis, et ita cessabit
opprobrium. Haec sunt quae te de inferno quaesisse opinor Abdia.
Procede si quid superest. Ait, Omnia quidem ita ad unguem executus es,
ut nullum penitus intermiseris nodum.
[199]
Nunc
itaque per Deum tuum obsecro, ut quoniam cuncta tibi quasi prae
manibus, diem iudicii plane mihi describas. Respondit, Placet, dum
attentus adsis. In die illo mandabit Deus angelo mortis, ut omnem
creaturam spiritum habentem interimat, tam angelos omnes, et diabolos
omnes, quam homines, aues, pisces, beluas, et pecora. Sic enim ait in
Alchoran : Omnia mortua praeter Deum. Post haec uocabit angelum
mortis, dicens : O Adreiel, estne quid superstes ex omni creatura
mea ? Dicet, Nihil domine mi, praeter me seruum tuum imbecillem. Tunc
dicet ei, Quoniam omnem creaturam meam occidisti, abi hinc inter
paradisum et infernum, et occide postremo teipsum, ac morere. Abibit
infelix, atque in praescripto interuallo proiectus humi, et alis suis
inuolutus, seipsum suffocabit, cum tanto quidem mugitu, qui et
coelestes spiritus et terrena animalia si uiuerent terrore exanimaret.
Stabitque totus mundus uacuus per quadraginta annos. Post hoc coelum
et terram pugno continens dicet : Ubi nunc reges et principes et
potentes saeculi ? Cuius est regnum, et imperium, atque rerum
potentia ? dicite, si ueridici estis. Et his uerbis ter repetitis,
suscitabit Seraphielem, et dicet : Accipe tubam hanc, et descende in
Hierusalem, et clange. Tunc accepta Seraphiel tuba, cuius longitudo
itineris quingentorum annorum, stans in Hierusalem insufflabit tubam,
exintus omnes animas iustas et iniustas inibi interim seruatas. Animae
euolantes in omnem terram, quaeque ad corpora sua, ubicunque sint
dispergentur, atque ad primum hunc sonitum omnium ossa congregabuntur.
Transactis quadraginta annis iterum sonabit. Ad quem sonitum ossa,
carnem, et neruos assument. Atque inde post quadraginta annos ubi
tertio sonuerit, omnes animae corpora sua induent. Sic facto, ignis ab
occidente accensus, omnis creatura Hierosolymam agitabit. Quo cum
omnes peruenerint, cessabit. Hic ergo ubi per quadraginta annos in
sudore suo natauerint, expectantes iudicium, tot tandem miseriis
affecti appellabunt Adam, sic dicentes : Pater Adam, pater Adam, ad
quid nos genuisti ? huiusmodi scilicet miseriis, et tormentis ? Itane
pater filios sub incerto fine, inter spem et metum fluitare pateris ?
quinimo Deum ora, ut plane finiat de nobis quicquid inter paradisum et
infernum facturus est. Respondebit Adam, et dicet : O filii filii,
scitis ut suadente diabolo inobediens praecepto Dei extiterim, quae
causa, ut indignus hoc habitus officio, uel huiusmodi praesumam. Sed
ite ad Noë. Conuersi ad Noë, dicent : Intercede pro nobis, electe Dei
pater Noë. Respondebit Noë dicens : Feci quod potui, saluaui uos in
diluuio. Hic nihil mihi superest officii. Sed ite ad Abraham.
Appellabunt Abraham, dicentes : Pater fidei et ueritatis, pater
Abraham, respice nos miseros, et miserere. Quibus Abraham : Quid a me
petitis ? Non recolitis, ut diu uagabundus idololatra incircuncisus
errauerim ? Non sufficio. Sed appellate Moysen. Appellabunt Moysen,
dicentes : Audi nos electe nuncie Dei, et propheta, famule Dei Moyses.
Quibus Moyses : Quem appellatis ? Nonne legem uobis dedi, miraculis
confirmaui, nec tamen credidistis ? Si mihi credidissetis, facere
possem quod postulatis. Sed ite ad Iesum Christum. Conuersi ad
Christum, dicent : Iesu Christe, spiritus, uerbum et uirtus Dei,
moueat te pietas tua, et intercede pro nobis. Tunc dicet eis Iesus :
Quod a me petitis, ipsi amisistis. Missus quidem fui uobis in uirtute
Dei, et uerbo ueritatis : uos autem aberrastis, et me plus quam ego
praedicauerim uobis, Deum
[200]
uestrum fecistis.
Hoc itaque beneficium meum amisistis. Sed ite ad ultimum prophetarum.
hunc significans, cum quo loqueris Abdia. Ad quem conuersi dicent : O
nuncie fidelis, et amice Dei, quam male quidem peccauimus. Exaudi nos
pie propheta Dei, spes una superstes. Nam post te, in quo sperabimus ?
Exaudi nos, potentia, tibi a Deo collata. Aderit itaque Gabriel : nec
impotentem sinet amicum suum uoluntatis suae. Procedent socii ante
faciem Dei, dicetque eis Deus : Scio ad quid uenistis. Absit itaque,
ut fidelis mei uotum in aliquo quassem. Hic ergo ponte facto super
infernum, ad caput pontis aderit statera : qua libratis uniuscuiusque
factis, ambulabunt super pontem. Salui ergo transibunt, damnati in
infernum decident. Quaere deinceps Abdia, quid placuerit. Et ille,
Proh dolor, quae me hucusque dementia tenuit ? ut uerum luce clarius
non uiderem. Sed quoniam omnia tibi pro uoto meo occurrunt, procede.
Nunquam enim haec audire fatigarer. Enumera ergo acies populorum in
die illa, et discerne fideles atque infideles. Respondit, Erunt acies
omnium hominum, CXX. e quibus tres tantum fidelium, reliquae omnes
infidelium : Eritque longitudo uniuscuiusque acieti itineris mille
annorum, latitudo uero quingentorum. Ait, Vere ita est, ut dicis.
Conclude postremum hoc, quod cum omnes creaturae in eum modum, quo
descripsisti, inter utramque regionem diuisae fuerint, quid fiet de
morte ? Respondit, Mutabitur mors in arietem, et adducent eam inter
paradisum et infernum. Eritque magna inter utriusque regionis incolas
dissensio. Nam populus paradisi metu mortis necem machinabitur.
Infernales uero spe mortis, superstitem fore cupient. uincet populus
paradisi, et mortem inter paradisum et infernum occident. Hinc Iudaeus
exclamans, ait, Vicisti optime Machumet, siste, et recipe confitentem
me. Ego credo, et uideo, quia non sunt dii, sed Deus unus omnipotens,
cuius uere tu nuncius et propheta.
EXPLICIT doctrina Machumet, quae apud Saracenos
magnae authoritatis est, licet ibi multa mendacia sunt, et multa
ridiculosa.
[201]